“Kuqezinjtë” sot pas dite kanë zhvilluar seancën e fundit stërvitore në Tetovë, ndërsa të mërkurën skuadra zhvendoset në Strumicë ku do të zhvillojë përgatitjet e fundit para sfidës së parë të raundit të dytë të eliminatoreve të UEFA Europa League përballë HJK Helsinkit të Finlandës.
Në ekip mbizotëron atmosferë pozitive, ndërsa gëzon bilansi shëndetësor pasi gjithë futbollistët janë shëndosh dhe në shërbim të stafit teknik. Të mërkurën në orën 14:00 trajneri Osmani dhe kapiteni Hasani do të paraqiten para mediave në konferencën zyrtare për shtyp, ndërsa “kuqezinjtë” nga ora 19:00 do të stërviten në stadiumin “Mlladost” në Strumicë. Ndeshja Shkëndija-HJK Helsinki luhet të enjten nga ora 18:00.