Trajneri Osmani dhe kapiteni Hasani kanë reflektuar optimizëm në konferencën për shtyp para takimit të parë me HJK Helsinkin në raundin e dytë të eliminatoreve të UEFA Europa League. Shkëndija-HJK Helsinki zhvillohet të enjten në Strumicë me fillim në orën 18:00.
Pasi eliminuan në mënyrë bindëse (7:0 rezultati i përgjithshëm) Daçian e Moldavisë, futbollistët e Shkëndijës maksimalisht janë koncentruar për sfidat e rradhës evropiane, kur të enjten përballet me HJK Helsinkin e Finlandës në ndeshjen e parë të raundit të dytë te eliminatoreve të UEFA Europa League. Në konferencën për shtyp zyrtare para takimit të nesërm shefi i stafit teknik Qatip Osmani dhe kapiteni Ferhan Hasani kanë folur me respekt për ekipin finlandez, mirëpo me besim në kualitetin e vet paralajmërojnë luftë të madhe për rezultat pozitiv.
“Pas kualifikimit në këtë raund të garave të Europa League ne e shfrytëzuam këtë periudhë për tu përgatitur për ti përmirësuar gabimet që patëm kundër Daçias, edhe pse ishin të pakta, por sërish kishte gabime. Në këtë raund na pret skuadra e Helsinkit e cila realisht është ekip më kualitative se Daçia ashtu që ne maksimalisht seriozisht e presim këtë ndeshje dhe nesër do të dalim për të nxjerë rrezultat pozitiv”, deklaroi shefi i stafit teknik, Qatip Osmani.
“Kemi para kundërshtar të fortë. Pas ndeshjeve që treguam në raundin e parë kundër Daçias edhe pse kishim rezultat të mirë, kjo nuk do të thotë se do ta kemi të lehtë në raundin e dytë, pasi kemi përballë kundërshtar të fortë. Mirëpo nëse përsërisim paraqitjet si në raundin e parë, me maksimumin e të gjithëve mendoj do të arrijmë rezultat pozitiv”, shprehet kapiteni Ferhan Hasani.
“Kuqezinjtë” prej sot janë vendosur në Strumicë, ndërsa në orën 19:00 do të zhvillojnë seancë stërvitore në stadiumin “Mlladost”.
Përballja Shkëndija-HJK Helsinki luhet të enjten në Strumicë, me fillim në orën 18:00.