Xhiroja e 13-të në Ligën e Parë të futbollit të Maqedonisë sjell transfertë të Shkëndijës në Koçani, ku do të përballet me Bregallnicën ‘vendase’. Njëjtë si stadiumi i qytetit në Tetovë edhe në Shtip është duke u punuar për rikonstruimin e terenit, kështu që Bregallnica ndeshjes si vendase i luan në Shtip. Si do që të jetë, ‘kuqezinjtë’ nuk ndryshojnë përcaktimin dhe në Shtip apo Koçani kërkesa është vetëm fitore. Me ambicie të tilla ekipi ka udhëtuar një ditë para drejt qytetit ku do luhet ndeshja.

“Mirë, unë nuk e njoh këtë skuadër, pasi asnjëherë nuk kam luajtur kundër tyre. Shpresoj që jo vetëm unë, por gjithë skuadra do të hyjmë në teren me pritje për të bërë më të mirën nga vetja. Të jemi skuadër kompakte prej fillimit deri në fund të ndeshjes. Do të luajmë në ofenzivë, pasi edhe pse luajmë jashta ne do të kërkojmë rezultatin tonë, që është fitorja dhe ajo është më e rëndësishme për ne në këtë moment”, deklaroi mbrojtësi brazilian, Karlinjo Rech.

Pas fitores së mesjavës me Metalurgun, trajneri Duro me stafin e tij kanë përgatitur ekipin për sfidën me Bregallnicën ku kërkohet fitore dhe tre pikë të reja. Në skuadër kthehet Armend Alimi që mungoi në mesjavë për shkak të pezullimit me karton të kuq, ndërsa do të mungojë sulmuesi kroat Bojan Vruçina që kundër Metalurgut pësoi një goditje në kavilje dhe për momentin ndjek terapi për eliminimin e hematomit të shfaqur. Futbollistët tjerë janë të gatshëm dhe stafi teknik në bazë të taktikës do të vendos për formacionin që do të nisë ndeshjen.

Përballja Bregallnica-Shkëndija luhet të dielën në Koçani, me fillim në orën 13:30.

Lista e 19-të futbollistëve të grumbulluar për takimin me Bregallnicën:

Marko Jovanovski, Enes Azizi, Egzon Bejtullai, Karlinjo Rech, Sedat Berisha, Artim Pollozhani, Ardian Cuculi, Xhelil Abdulla, Muhamed Useini, Besir Demiri, Ennur Totre, Stenio Zhunior, Bllagoja Todorovski, Armend Alimi, Marjan Radeski, Besart Ibraimi, Shpend Asani, Hristijan Kirovski dhe Meriton Korenica.

‘Buba’ pranë ekipit në stërvitje, Lama nis të vrapojë!

Kapiteni Ferhan Hasani edhe pse nuk mund të ushtrojë pas operimit të ligamenteve, vazhdimisht është pranë skuadrës. Ai ndoqi nga afër seancën e fundit stërvitore, duke motivuar bashkëlojtarët që të japin më të mirën në çdo takim. ‘Buba’ ka potencuar se beson në forcën e grupit dhe se loja kolektive dhe angazhimi maksimal duhet te jenë arma kryesore në kërkim të fitores kundër Bregallnicës në Koçani. E ndërkohë pasi pak më shumë se dy muaj më parë gjithashtu operoi ligamentet, ka nisur me vrapime të lehta sulmuesi i ri Bashkim Lama. Shtatëlarti duhej të luante këtë gjysmësezon si huazim te Makedonija Gj.P., mirëpo një javë para fillimit të sezonit këputi ligamentet në një ndeshje testuese. Lama dhe Buba, bashkë me Bojkun e Juffon çojnë në katër numrin e futbollistëve të Shkëndijës që këtë vjeshtë ishin të pafat, duke pësuar lëndime identike.