KF Shkëndija njofton se nuk do të ketë udhëtim të organizuar të tifozëve për takimin e xhiros së 11-të, Vardari-Shkëndija. Kjo vjen pas mbledhjes së mbajtur në FFM, ku përveç klubeve morën pjesë edhe përfaqësues të MPB-së. Për gjithë tifozët e privat në hyrje do të kërkohet letërnjoftim.

Të dielën në Shkup do të zhvillohet derbi i madh i kampionatit të Maqedonisë, kur në kuadër të xhiros së 11-të Shkëndija do të jetë mysafire e Vardarit. Interesi për këtë ndeshje është i madh, mirëpo duke parë rivalitetin e dy klubeve, FFM-ja detyrohet të dalë me masa paraprake për shmangjen e incidenteve të padëshiruara. Përvoja nga e kaluara thotë se Ministria e Punëve të Brendëshme zakonisht rekomandonte ndalesë për tifozët mysafirë për shkaqe sigurie, duke ndaluar përveç grupeve të organizuara edhe tifozët privat. Të enjten në hapsirat e FFM-së u zhvillua mbledhje në të cilën u bisedua për këtë takim dhe në të njëjtin përveç klubeve dhe zyrtarëve të shtëpisë së futbollit vendor morën pjesë edhe përfaqësues të MPB-së, kompanisë private për sigurim dhe personave tjerë të kyçur në organizimin e kësaj përballeje. Duke dashur të shmangin probeleme eventuale MPB nga FFM ka kërkuar ndalesë të udhëtimit të organizuar të tifozëve mysafirë. Për këtë qëllim KF Shkëndija me rekomandim të organeve të lartëpërmendura nuk do të organizojë udhëtim të grupit të tifozëve ‘Ballistët’. Ndërkohë MPB dhe FFM-ja kanë vendosur që në hyrje të stadiumit çdo tifoz përve biletës, duhet të tregojnë edhe dokument identifikimi (letërnjoftim).

Me këtë rast KF Shkëndija kërkon mirëkuptim nga të gjithë tifozët dhe njëkohësisht shpreson që ata që do të arrijnë të futen në stadium në mënyrë private gjatë ndeshjes mos lejojnë të bien pre e provokimeve eventuale nga tifozët vendas.