Të mërkurën përballë Makedonija Gj.P. kërkojmë kualifikim në finale të Kupës. Gjysmëfinalja luhet vetëm me një ndeshje dhe fituesi kalon në finale.
NDESHJA
Shkëndija vs Makedonija Gj.P.
Kupa e Maqedonisë, gjysmëfinale
Stadiumi i qytetit në Tetovë
E nërkurë, 5 prill, ora 15:00
Kuqezinjtë për një çast heqin vëmendjen nga kampionati, pasi mesjava është e rezervuar për gjysmëfinalen e Kupës. Gara më masovike në vend ka mbëritur në aktin e parafundit dhe Shkëndija synon të vazhdojë rrugëtimin deri në fund. Ashtu si vitet e fundit prej shfaqjes së pandemisë me Covid-19, Kupa e vendit luhet me sistemin e eliminimit me vetëm nga një ndeshje, dhe shorti vendosi që gjysmëfinalja e sivjetshme ndërmjet Shkëndijës dhe Makedonija Gj.P. të luhet në Tetovë. Kështu kuqezinjtë para publikut tetovar do të kërkojnë fitore e cila na çon në finale ku do të diskutohet trofeu i Kupës me fituesin e gjysmëfinales tjetër Struga-Sileksi.
Për të ardhur në gjysmëfinale, Shkëndija në fazën paraprake eliminoi FC Shkupin. Ndeshja e 1/4 së finales në Çair faktikisht u luajt vetëm 10-të minuta, pasi dihen ngjarjet që pasuan pasi Shkëndija avansoi 1:0 me golin e Elezit. Hyrja e publikut në terren solli ndërprerje, derisa fitorja zyrtare 3:0 i’u dha Shkëndijës.
Paraprakisht në 1/8 e finales kuqezinjtë eliminuan Skopjen pas triumfit 5:0 në Tetovë, derisa në start të garës, në 1/16 e finales Shkëndija mundi 3:0 Karaormanin në Strugë.
Makedonija Gj.P. luan me formë të ndryshueshme në kampionat dhe pas 25 xhirove mban vendin e 6-të me 32 pikë të tubuara.
Skuadra nga Shkupi është fituese në fuqi e Kupës dhe deri në gjysmëfinale erdhi përmes 2 fitoreve. Në start të garës (1/16 e finales) Makedonija Gj.P. ishte e lirë si fituese në fuqi e Kupës, derisa në 1/8 e finales fituan 2:0 si mysafire në Prilep përballë Pobedës. Në çerekfinale Makedonija Gj.P. eliminoi Akademia Pandevin, pasi në përsëritjen e finales së fundit, shkupjanët triumfuan 1:0.
Skuadra
Klisman Cake dhe Mevlan Murati kthehen në lojë pasi munguan në fundjavë shkaku i pezullimit me nga 5 kartona të verdhë.
Mungesë e madhe në këtë ndeshje do të jetë Ferhan Hasani, i cili doli i dëmtuar të dielën përballë Pobedës. Kapiteni ndjen dhimbje në muskulin e këmbës (pulpë) dhe menjëherë ka nisur procesin e rehabilitimit.
Shkaku i dëmtimeve jashta kombinimit mbeten Metodi Maksimov dhe i riu Lorik Jakupi.
Transmetimi
Përballja Shkëndija-Makedonija Gj.P. zhvillohet të mërkurën me fillim në orën 15:00 në stadiumin e qytetit në Tetovë dhe do të transmetohet drejtëpërsëdrejti në kanalin zyrtarë të klubit në Youtube.