Shkëndija të mërkurën në Tetovë kërkon tre pikë të reja në duelin e xhiros së 14-të, ndërsa do të luajë pa praninë e publikut për shkak të dënimit të shqiptuar nga Komisioni Diciplinorë i FFM-së.

Pas pauzës 10-të ditore për shkak të ndeshjeve eliminatore për kualifikimet e Kampionatit Botëror ‘Rusi 2018’, rikthehen garat në kampionatin elitar të Maqedonisë, që sjell ndeshjet e xhiros së 14-të. Shkëndija do të përballet në Tetovë me Bregallnicën e Shtipit, në një duel që do të luhet pa praninë e publikur për shkak të ndalesës së shqiptuar nga ana e Komisionit të Diciplinës të Federatës së futbollit të Maqedonisë. Skuadra ‘kuqezi’ në periudhën e kaluar ka punuar në drejtim të ngritjes së formës dhe eliminimit të mangësive të shfaqura në lojë kohëve të fundit.

Të hënën dhe të martën stafi teknik ka pasur në dispozicion gjithë futbollistët, pasi janë kthyer reprezentuesit Hasani e Ibraimi, si dhe Totre që ishte disa ditë në kamp stërvitor me përfaqësuesen U 21. Cuculi do të mungojë për shkak të pezullimit me dy ndeshje, ndërsa Juffo është jashtë kombinimit shkaku i lëndimit. Në skuadër kthehet Egzon Bejtullai, ndërsa stafi teknik para ndeshjes do të vendosë për formacionin startues.

Përballja Shkëndija-Bregallnica luhet të mërkurën në stadiumin e qytetit në Tetovë, me fillim në orën 13:00.