Ditën e enjte me fillim në orën 17:00, kuqezinjtë në Jerevan të Armenisë do të zhvillojnë ndeshjen e kthimit ndaj FC Ararat. Me epërsinë e krijuar nga ndeshja e parë me dy gola diferencë, kuqezinjtë në Jerevan do të kërkojnë kualifikimin në raundin e dytë eliminator të UEFA Ligës së Konferencës.
Detajet e ndeshjes:
E enjte, 14 korrik
Ndeshja e dytë – raundi i parë eliminator i UEFA Conference League
Stadiumi Republikan në Jerevan
🆚 FC Ararat | ⏱ 17:00 | 📺 SuperSport
Arbitër kryesor i takimit do të jetë Oleksii Derevinskyi, do t’i ndihmojnë Semen Shlonchak dhe Andrii Skrypka, ndërsa arbitër i katërt do të jetë Yevhenii Aranovskiy, që të gjithë nga Ukraina.
Opinioni:
Ferhan Hasani: “Pas lojës së mirë dhe rezultatit pozitiv nga ndeshja e parë, tani na presin edhe 90 minuta tjera. Do të futemi në ndeshje që të nxjerrim rezultat sa më pozitiv. E kemi analizuar ndeshjen e parë dhe besoj se me përkushtim maksimal në fushën e gjelbër do të arrijmë që të kualifikohemi në raundin tjetër”.
Të rejat në skuadër:
Bashkim Veliu ka filluar të stërvitet bashkë me skuadrën, por akoma nuk është i gatshëm për lojë dhe nuk do të jetë në dispozicion të trajnerit Shaqiri. Lojtarët tjerë janë të gatshëm për lojë.
Kundërshtari:
FC Ararat, i njohur si Ararat Yerevan është klub që luan në kampionatin e Armenisë. Është skuadër e themeluar që në vitin 1935, e që këtë vit përfundoi në vendin e katërt në Premier Ligën Armene, Është ky sezoni I 13-të në historikun e kësaj skuadre që merr pjesë në garat në kompeticionet evropiane.
