Fitorja 3:0 ndaj Renovës ka lënë të kënaqur stafin teknik të Shkëndijës, që vlerëson paraqitjen e ekipit në derbin lokal.
• Gjoka: “Gjitha ndeshjet janë të rëndësishme edhe kjo me Renovën ishte e tillë”
• Gjoka: “Funksionuam mirë, sidomos në pjesën e dytë kur kishim lojën në kontroll”
• Gjoka: “I lumtur për Igorin. Dashi vazhdon të shënon, sigurisht ishte goli i Rubinit”
Kuqezinjtë vazhdojnë sipas planit dhe në xhiron e 26-të skuadra merr fitoren e 17-të sezonale duke mundur Renovën me shifrat 3:0 në derbin lokal të Tetovës. Golat e Ibraimit (51’), Da Silva-s (75’) dhe Elezit (90’) i japing 3 pikë skuadrës së Ernest Gjokës dhe kur kanë mbetur 7-të ndeshje deri në mbyllje të sezonit Shkëndija ruan diferencën 10-të pikë para ekipit të vendit të dytë.
Ernest Gjoka: “Gjitha ndeshjet janë të rëndësishme edhe kjo me Renovën ishte e tillë, sepse mbi të gjitha ishte edhe një derbi i qytetit. Kështu që ishte e rëndësishme të fitojmë. Kampionati vazhdon akoma të jetë i egër, por sot ndeshja kaloi mirë, ekipi funksionoi mirë sidomos në pjesën e dytë kur gjithçka kishim nën kontroll. Arritëm dhe shënuam dhe tash na mbetet të qetësohemi, të çlodhemi dhe të përgatitemi për të mërkurën kur fillon dhe rritet shkalla e vështirësisë.”
Ernest Gjoka: “Sigurisht
kur rezultati shkon 3:0 kemi edhe qetësi, kur skuadra është e qetë të jep akoma
më shumë mundësi e qetësi, sidomos në posedimin e topit sepse skuadra e ka
cilësinë. Ndeshjet janë të tilla, ndonjëherë ne kërkojmë me gjithçka dhe na kap
nervozizmi, ndonjëherë fillojmë dhe e qetësojmë lojën, qetësojmë veten, gjejmë
rastet dhe i shfrytëzojmë ato. Kjo është pjesë e lojës dhe ndeshjeve të çdo
jave. Them që sot ekipi funksionoi mirë, sidomos në pjesën e dytë pasi pjesa e
parë ishte më në ekuilibër, Renova ishte më agresive. Në pjesën e dytë pastaj
ekipi filloi e bëri diferencën.”
Ernest Gjoka: “Asisti i Hebajt për Elezin!? Këto gjëra janë pjesë
normale e një ekipi me mentalitet fitues dhe një skuadre me mentalitet
europian. Kështu që kjo duhet të na karakterizojë në vazhdimësi sepse nuk ka
rëndësi kush bën gol, e rëndësishme është të shënojmë gola. Më bëhet qefi për
Igorin (Da Silva) sepse kishte kohë që e tregon se ka klasin e vet teknik, por
duhet të vijë te goli. Por është edhe moment i përshtatjes sepse në futboll
këto gjëra kanë kohën e vet. Dashi (Elezi) vazhdon shënon, sigurisht që ishte
goli i Rubinit (Hebaj), por ishte Dashi shumë afër portës dhe mori asistin për
të shënuar. Sigurisht na bëhet qefi sepse ndryshojmë lojën, fusim lojtarë,
ndryshojmë nivelin, ndryshojmë ritmin, rritim nivelin fizik, rritim cilësinë
dhe shënojmë. Kjo është gjitha ajo se si duhet të funksionojë një skuadër si
Shkëndija.”
Ernest Gjoka: “Mendoj që jemi ok për dy khtimet (Zahov dhe Krivak), sidomos flasim për Jan-in (Krivak) më shumë që pati një dëmtim të rëndë dhe e mbajti jashta skuadrës disa kohë. Kështu që ndeshja me Akademinë është një takim ku ai do të fillojë nga fillimi, i uroj që të jetë në nivelin e tij edhe pse ka kaq kohë pa luajtur. Por është shumë i rëndësishëm për skuadrën, është një frymë ndryshe dhe një lojtar që ishte titullar para dëmtimit dhe ne mbështetemi shumë te ai, sidomos në dyshen e mbrojtjes midis Egzonit (Bejtullai) dhe Jan-it.”
