Trajneri Ernest Gjoka vlerëson pozitiv barazimin 2:2 në fushë të Vardarit, megjithëse vlerëson se me pak kujdes Shkëndija mund të merte fitoren.

• “Më mbetet peng fakti që sot nuk fituam duelin me Vardarin”
• “Gabuam në pranimin e golit të dytë, tjetra ishte shumë ok”
• “Donim fitore, por s’është keq barazimi në fushë të Vardarit”
• “Kemi potencialin për të përmbysur negativën prej 8 pikëve”

Shkëndija ka mbyllur gjysmësezonin vjeshtor me barazim 2:2 në transfertën me Vardarin në Shkup. Një takim i administruar mirë nga tanët solli dy episode kur vendasit panë veten në epërsi fillimisht me penaltinë e Najdovskit e më pas edhe kundërsulmin e Adem, por Shkëndija përgjigjet dy herë me Omar Imerin që fikson barazimin 2:2. Në fund i’u afruam fitores, por goditja e Radeskit nuk gjeti kuadrantin.

Ernest Gjoka: “Sigurisht më mbetet peng që nuk fituam dhe sidomos të goli i dytë që pësuam nuk duhet të bëjmë ashtu gabime. Janë disa gjëra që ne i kemi punuar gjatë gjithë kësaj kohe për të mos u gjetur në atë situatë që na ndodhi. Duhet të kishim vepruar më egër, të ishim më agresivë për ta ndaluar atë aksion të kundërshtarit. Ky është i vetmi peng sepse mendoj se në pjesën tjetër skuadra arriti të japë më të mirën. Kjo ndeshje me pak kujdes mund të ishte fituar. Por vazhdojmë të bëjmë gabime që na sjellin pasoja”.

Ernest Gjoka: “Sot shumë më e rëndësishme do të ishte sikur të kishim fituar. Mundësitë i kishim, por janë aspekte të veçanta të lojës ku gabojmë. Gjithsesi edhe një pikë në transfertë ndaj Vardarit unë mendoj se është pozitive, por sot kishim nevojë për tre pikë”.

Ernest Gjoka: “Unë mendoj se Shkëndija e ka potencialin për të ecur përpara, por duhet të kemi shumë kujdes, të punojmë shumë këtë periudhë pushimi për të ndryshuar disa gjëra që të jemi më agresivë. Ndeshjet në transfertë duhet të fillojmë t’i mendojmë ndryshe, pse jo të arrijmë t’i fitojmë”.